ភ្នំពេញ៖ អតីតឯកអគ្គរាជទូតជប៉ុន លោក ស៊ីណូហារ៉ា កាត់ស៊ូហ៊ីរ៉ូ (Shihohara Katsuhiro) មានប្រសាសន៍សំដែងនូវការភ្ញាក់ផ្អើលចំពោះភាពរីកចំរើនដ៏អស្ចារ្យរបស់ប្រទេសកម្ពុជា ក្រោមការដឹកនាំប្រកបដោយកិត្តិបណ្ឌិត របស់សម្តេចតេជោ ហ៊ុន សែន និងបន្តក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។

លោក ស៊ីណូហារ៉ា កាត់ស៊ូហ៊ីរ៉ូ ថ្លែងដូចនេះក្នុងឱកាសរូបលោក និង ប្រធានតំណាងមូលនិធិគាំ្រទការអប់រំអន្តរជាតិកម្ពុជា លោក កាណៃ អាត់ស៊ូស៊ី ចូលជួបសំដែងការគួរសមជាមួយប្រធានក្រុមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា សម្តេចតេជោ ហ៊ុន សែន ព្រឹកថ្ងៃទី១៦ ខែវិច្ឆិកា ឆ្នាំ២០២៣ នៅវិមាន៧មករា។

ក្នុងជំនួបនេះដែរ លោក កាណៃ អាត់ស៊ូស៊ី ក៏មានប្រសាសន៍ជំរាបជូនសម្តេចតេជោថា រូបលោកធ្លាប់បានជួយកម្ពុជាលើបញ្ហាភ្នែកជូនប្រជាជនកម្ពុជា រយៈពេលជាង ៣០ឆ្នាំមកហើយ ក្នុងនោះរួមទាំងបានជួយពិនិត្យព្យាបាល និងផលិតកែវភ្នែកជូនសម្តេចតេជោផងដែរ។

លោកវេជ្ជបណ្ឌិតបន្តថា រូបលោកខកខានមកកាន់កម្ពុជារយៈពេល ១៣ឆ្នាំមកហើយ មកដល់ពេលនេះរូបលោកមានការភ្ញាក់ផ្អើលយ៉ាងខ្លាំងចំពោះការរីកចំរើនយ៉ាងឆាប់រហ័ស និងមានភាពអស្ចារ្យរបស់ប្រទេសកម្ពុជា ក្រោមការដឹកនាំរបស់សម្តេចតេជោ និងបន្តមកក្រោមការដឹកនាំរបស់សម្តេចធិបតី ហ៊ុន ម៉ាណែត។

ទន្ទឹមនោះ សម្តេចតេជោមានប្រសាសន៍ថ្លែងអំណរគុណចំពោះថ្នាក់ដឹកនាំទាំងពីរ ដែលបានចូលរួមសហការជាមួយសម្តេចកាលពីពេលកន្លងមក ពិសេសការចូលរួមសហការលើបញ្ហាភ្នែករបស់លោកវេជ្ជបណ្ឌិតសាស្រ្តាចារ្យកិត្តិយស កាណៃ អាត់ស៊ូស៊ី នៅកម្ពុជា ក្នុងនោះរួមទាំងបញ្ហាផ្នែករបស់សម្តេចផ្ទាល់ មានភាពល្អប្រសើរបំផុត។

សម្តេចតេជោក៏បានបញ្ជាក់ពីគោលបំណងនៃការអញ្ជើញទៅប្រទេសជប៉ុន នៅពេលខាងមុខ ដើម្បីពិនិត្យសុខភាពភ្នែករបស់សម្តេចផងដែរ៕